من أوراق الذاكرة الحيّة

وفاكر يامّه ..

لماّ ..

كنتِ بتكبري ف اليوم سنة

وانت بتحاولي وحدك ..

تخلقي جنّة ..

من نار بتحرقك ..

وتخللي حياتك ..

آلآم .. مزمنة

وتطرح كفوفك تمر حنّة

وآه من كفوفك المعدَمَه

فاكر الجفا ..

وعدم الوفا

وأيام البرد ..

اللى ماعرفنا فيها طعم الدّفا

وانت مصممة ع الحياه

بكل صورك الممكنة

فاكرك وانت من توب الكفَن ..

بتنسجي فستان فرَح

ومن ريحة العفَن

التمر حنة طرَح

فاكر اليأس

لما كان يترسم على وشّك

ويصرخ فيكي أنا هنا

كان يأس صريح

زي قاتل بيواسي جريح

كأنه بيقوللك مش هقوللك ..

أنا الأمل .. وأغشك

لا هاقولهالك ف وشك

أنا اليأس بن الجزمة

انا كل الناس ..

اللي مالهاش ..

أي تلاتين لزمة

الكلاب المتلونة

فاكر يامّه .. سماكي

والغربان الحديد ..

اللي بتسمم هواكي

فاكرها ..

غربان سوده .. ومتمكنه ..

وانت لما تقعي ..

ماتقعيش

تصرخي ياولاد الكلب

في عز الموت هعيش

فاكر وربنا

رمضان شحاته

شاعر المحكيّة / جمهورية مصر العربية